2006
*Ikuslearen
saria ikuskizun onenarentzat 2007ko Azpeitiako antzerki topaketetan.
"Bidea
ikusiko duzu gauza guztietan. Iparra, hegoa,ekialdea,mendebaldea:
bizitza eta heriotza, bidegurutze batean.
Bidean aurkitu egiten duzu,eta aurkitu egiten zaituzte. Ikasi egiten
duzu eta ikasi egiten zaituzte. Bideak aukeratzen du; ez gizakiak.
Bideak argi-itzalen paisaietan barrena eramaten zaitu, iraganetik
etorkizunera, gauza ezagunetatik ezezagunetara.
Horregatik bidaiari guzti-guztiek dakite, bihotz barrenean, itzultzea
ezinezkoa
dela."
Aukeran-Bideak:
Sortu genuenetik
bertatik, kultura, musika eta koreografia mestizajea duen mundu batean
bizi garela nabarmendu nahi izan du AUKERANek. Horregatik, erritmo,
melodia eta folklore tradizionaleko elementuak dantza garaikidearekin
bateratuz, eta gure erritmoak eta urrutiko musika-erritmo ezagunak
nahastuz gure estiloa bilatu dugu.
BIDEAKen kasuan, bat egite hori oso egokia dela pentsatzen dugu. Izan
ere, ikuskizunak bideen eta bide gurutzeen inguruko hausnarketa egiten
du, bai eta belaunaldiz-belaunaldi egindako ibilbidean gertatutako
trukeaz ere. Iparra, hegoa, ekia, mendebala: bizitza eta heriotza,
sorrera eta suntsipena, amodioa eta guda bide gurutze batean.
Bidean aurkitu egiten duzu eta aurkitu egiten zaituzte. Ikasi egiten
duzu eta zugatik ikasten dute. Gure herria zeharkatzen duten bideek,
Santiagoko bideak, bereziki, hainbat kulturekin eta joerekin
harremanetan jarri gintuzten, eta Europa osoko musikek eta dantzek bat
egiteko aukera eman zuten. Horregatik, BIDEAKen beste dantza eta musika
tresna batzuk sartzea nahi dugu.
Iparraldetik, Eskandinaviako erritmo bitarrak , Eskoziako eta Irlandako
erritmo hirutarrak eta Bretainiako fraseatuak eta armoniak, uillean
pipes (gaita irlandarra), whistles, Bretainiako bonbardak, Eskoziako
danborrak, hurdy-gurdy (zanfoña) gisako musika tresnak hartu
ditugu. Hegoaldetik, ordea, erritmo hirutar arabiarrak, darbukas, tar,
kastainuelak, nay musika tresnak ekarri ditugu. Hori guztia gure
tradizioarekin, gure oinarriarekin nahastuko dugu: erritmo bitarrak eta
hirutarrak, euskal amalgamako erritmoak (Binangoa, Launangoa...) eta
zortzikoa; alboka, txistua, xirula, ttun-ttuna...
Eta zer esan horri guztiari buruz? Edozein bidaiarik barru-barruan daki
itzultzea ezinezkoa dela. Bideak aukeratzen duela, eta ez gizonak. Argi
eta itzal paisaietan barrena eramaten zaituela, lehenalditik
etorkizunera, ezagunetik ezezagunera. Gurea, beraz, bide metaforikoa
da, bizitzaren irudia eta historiaren igarotzea.
Ideia horiek irudikatu ahal izateko, koreografiaren sorreran eta
eszenaratzean bi oinarrizko elementu sartuko ditugu: sokak eta zintak,
eta horiek izango dira ikuskizunari lotura emango diotenak. Zintak
aspalditik gure herriko dantza tradizionalei lotutako elementuak dira.
Soka-dantzak ere oso ugariak dira gure folklorean. Eta biak izan
daitezke bidearen irudikapen, bidaiari garen bide horren irudikapenak.
Hala, bidaia fisikoa bidaia izpiritual baten alegoria bilakatzen da.
Bideak ezagutzara garamatza, bizitzaren iheskortasunaren jakitun
izatera eta jaiotzatik heriotzara garamatzaten garaien banaketara.
Atze-oihalaren gainean gure BIDEAK proiektatzea proposatuko dugu, izan
ere egia da leku batera bide askotatik hel daitekeela, eta puntu bakar
batetik, mapan edozein tokitan egonda ere, munduko edozein lekura
eramango gaituzten bideak ateratzen direla.
|
 |
