Revuo Adavane!
Adavane! esas la oficala revuo dil ISH e mondala refero pri periodala publikigaji en Ido. Nova numero publikigesas singla duesma monato, e disdonesas al tota mondo kom pdf-dokumento. La temi pri qui la revuo traktas esas tre diversa: aktualeso, teknologio, historio, literaturo, edc. La revuo ne nur redaktesas da la membri di la ISH, ma anke da multa internaciona kunlaboranti. Vu povas gratuite lektar Adavane! en olua ret-situo.
Radio Idia Internaciona
Radio Idia Internaciona esas projeto por ofrar a la idala komuneso mikra radio-programo por askoltar registraguri en Ido. Nuntempe olua formo esas simila kam podkasto, e sam-maniere kam Adavane!, ol traktas pri diversaji. Lu anke kustumas ofrar lektaji de texti publikigita antee surpapere qui povas komprenesar da irga askoltanto havanta mikra nocioni di Ido. Radio Idia Internaciona distributesas kom mp3- dokumenti en olua ret-situo.
Wikipedio per Ido
La ISH entraprezis la iniciala laboro pri komenco e traduko ad Ido di Wikipedio, grava projeto di qua skopo esas krear gratuita enciklopedio interretala. Nuntempe, la projeto Wikipedio en Ido esas tote administrata da la idala komuneso, qua tre sucesis lokizar Ido en la listo dil 30 unesma idiomi segun olia artiklo-nombro, e kom duesma helpanta linguo.
Literaturo ed publikaji
La ISH mantenas interretala situo por kompilar publikigaji, kursi, vortari e diversa literaturo. La situo nomesas publikaji ed ibe, omna disponebla lektaji esas komplete gratuita. Periodale, la kompilo ampligesas da nova texti, e la skopo esas krear idala dokumentaro kontenanta la maxim posibla nombro di disponebla verki.
Lernaji
La ISH developis la bazala lernaji por ke irga Hispan-parolanto povas lernar Ido sen plusa helpo e sen grava esforci. La lernaji konsistas ek exerci e vortari, e li esas gratuite deskargebla de la pagino pri publikaji dil societo.
Novajeti, ret-situo pri aktualeso
Novajeti esas ret-situo developita da la ISH por publikigar mikra artikli pri aktualeso en Ido, sendita da la lektanti. Ma en Novajeti ne nur fitas irga novajo, ultre esas loko por la debato en la forumi quin singla artiklo kontenas.